MECHI YA YANGA NA ATLETICO YA BURUNDI JANA.

Yanga wakitoka uwanjani kwa unyonge.

Atletico FC wakishangilia baada ya mechi.

Kocha wa Atletico akipongezwa na kocha wa Tom wa Yanga.

 YANGA jana imeanza vibaya michuano ya Klabu Bingwa Afrika Mashariki na Kati baada ya kufungwa 2-0 na Atletico ya Burundi Uwanja wa Taifa Dar es Salaam.

Mabao mawili ya Olivier Ndikumana katika dakika ya 81 na 90+3, yalitosha kuipa Atletico FC ushindi wa 2-0 dhidi ya mabingwa hao watetezi, huku Yanga ikiwa imecheza ovyo pamoja na kuzidiwa katika kila idara- angalau baada ya kufungwa bao la kwanza walijaribu kushambulia kwa mipira ya pembeni lakini walipopigwa la pili katika dakika ya tatu ya muda wa nyongeza baada ya dakika 90 kupita ‘walitepeta kabisa’.

Yanga ilikuwa ikicheza mechi ya pili chini ya kocha mpya Mbelgiji Tom Saintfiet baada ya mechi ya awali ya kirafiki dhidi ya JKT Ruvu ambayo timu hiyo ilishinda 2-, Falsafa ya Tom anayeingia katika wiki ya pili tangu atue Jangwani ni kucheza soka ya utulivu, zaidi wakipaki basi- wakati umaarufu wa Yanga kwa muda mrefu ni soka yao ya kasi na pasi ndefu, zaidi wakitumia mashambulizi ya kutokea pembeni na ndio maana mawinga wengi bora na maarufu nchini walicheza Yanga, hii ni tangu enzi za akina Awadh Gessan, Leonard Chitete, Abubakar Salum ‘Sure Boy’, Sanifu Lazaro ‘Tingisha’, Edibilly Lunyamila, Ephraim Makoye, Mrisho Ngassa na wengineo.

Yanga wapo kwenye kipindi cha mpito kuelekea katika mabadiliko ya mfumo wa uchezaji ambao ukifanikiwa utakuwa bora zaidi na wenye tija.